毅行

昨晚午夜夢迴，回到麥理浩徑第九、十段，那如夢魘般的二十公里，而家諗返都想嘔。

記得當日去到CP9時，右膝劇痛難當，冬青膏、止痛藥全然無效，加上胯下情況未明的傷勢，那時候一度想過放棄。理性告訴我剛走過的88公里路是sunk cost，今年收皮，青山還在，哪怕無柴燒。不過堅持或放棄，往往只是一念之差，最後神推鬼㧬，走完了最後的12公里。衝線的那刻，像喪屍，全然沒有興奮的感覺，只想沖涼瞓覺。

「我以後都唔會再玩毅行者。」當時我是這樣想的。

想來當日報名，有一半是因為有些事現在不做，一輩子都不會做了，另一半則是因為反正現在都無乜野做，不如搵啲細藝過下日晨。毅行者後幾日，隊友問下年仲玩唔玩，我說：咪搞我。原來，有些事現在做左，一輩子都不會再做了。

毅行者這玩意，難，難在2日行100公里，聽到都驚。然後行到途中，你會發現，想放棄，更難。初段，肚餓兼眼瞓，食大會麵包食到想死，又有排都未有支援隊，你會想：無理由咁早收皮，好柒；行到一半，疼痛開始向全身蔓延，止痛藥開始失效，你會想：仲有一半，應該ok；去到尾段，下半身開始癱瘓，精神瀕臨崩潰，止痛藥完全失效，你會想：仲差少少，行埋佢。到最後行完，你會發覺，毅行者，其實幾簡單，原來咬緊牙關，頂硬上，就得。毅力者講的，本身就是抱著毅力去行。毅力行頭，能力其次。很難，卻也很簡單。

是以，我仍然建議未玩過既，去玩一次。有些事情，你唔試，你永遠唔會知。

如果下年有朋友參加，需要支援隊，歡迎搵我。